КҮӨХ ТҮҮЛ ЫРЫАЛАРА

[Синильга]

УҺУЛУЧЧУ ҮЧҮГЭЙ КИҺИ ДИЭН ХАҺАН ДА СУОХ
Аскалон Павлов тыла уонна мелодията

Уһулуччу үчүгэй, хорсун хоодуот, үтүө көнө
Киһи диэн суох бу дойдуга,
Киһи хаһан баҕарар кус сүрэхтээх, итии хааннаах
Эбэтэр уйан санаалаах.

Уһулуччу үчүгэй
Киһи диэн хаһан да суох.
Уһулуччу үчүгэй
Киһи диэн хаһан да суох.

Киһи сорох ардыгар ытыыр, ыллыыр, күлэр, оонньуур.
Сороҕор түһээн түҥнэстэр,
Киһи хаһан баҕарар сүүрэн-көтөн, булан-талан
Үйэтин моҥуон баҕарар...

Уһулуччу үчүгэй
Киһи диэн хаһан да суох.
Уһулуччу үчүгэй
Киһи диэн хаһан да суох.

Букатын бардаҕына, өлөн-сүтэн хааллаҕына,
Хаарыан киһи диэн аатырар.
Үчүгэй киһи этэ, суобас бэрдэ, көнө майгы
Ахтыллан кэлэр түмүккэ.

Уһулуччу үчүгэй
Киһи диэн хаһан да суох.
Уһулуччу үчүгэй
Киһи диэн хаһан да суох.

Ким эрэ кими эрэ була сатаан, булса сатаан
Түһэриэн олус баҕарар...
Ким эрэ кими эрэ харчы, көмүс, баай туһуттан
Кэккэттэн туора туруорар.

Уһулуччу үчүгэй
Киһи диэн хаһан да суох.
Уһулуччу үчүгэй
Киһи диэн хаһан да суох.

[Синильга]

ДЬОН ДУУҺАТЫН КЫНАТТАА
Василий Антипин тыла уонна мелодията

Эн ыллаа олохпут
Кэрэтин, күндүтүн.
Эн ыллаа эдэр саас
Тапталын, үөрүүтүн.

Эн ыллаа
Кыбыстан турбакка,
Эн ыллаа
Санаарҕыы барбакка.
Эн ыллаа
Дьон дууһатын кынаттаа.
Эн ыллаа төрөөбүт
Дойдугун уруйдаан.
Эн ыллаа күн күбэй
Ийэҕин айхаллаан.

Эн ыллаа эрдэ саас
Ньургуһун тылларын.
Эн ыллаа киэҥ алаас
Хатыҥнаах чараҥын.

Эн ыллаа
Кыбыстан турбакка,
Эн ыллаа
Санаарҕыы барбакка.
Эн ыллаа
Дьон дууһатын кынаттаа.
Эн ыллаа төрөөбүт
Дойдугун уруйдаан.
Эн ыллаа күн күбэй
Ийэҕин айхаллаан.

[Синильга]

ЫРААХ СЫЛДЬАН
Люба Готовцева тыла уонна мелодията

Мин түүнүн түүл буолан
Эн санааҕар киириэҕим,
Мин тыгар күн буолан
Эн олоххун сырдатыам.

Ыраах сылдьан өрүүтүн
Эйигин саныаҕым,
Туспа сылдьан күн аайы
Санааҕар буолуоҕум.

Мин суох да буолларбын
Эн аттыгар баар буолуом,
Тыал, ардах буоламмын
Хом санааҕын киэр үүрүөм.

Ыраах сылдьан өрүүтүн
Эйигин саныаҕым,
Туспа сылдьан күн аайы
Санааҕар буолуоҕум.

Суох, эрэммэппин диэмэриий
Мин туспа сылдьарбар,
Суох, соҕотохтуу хаалларан
Эн бараҕын диэмэриий.

Ыраах сылдьан өрүүтүн
Эйигин саныаҕым,
Туспа сылдьан күн аайы
Санааҕар буолуоҕум.

[Синильга]

Кыайыы күнүгэр ананар
ТЫЫННААХТАР УМНУБАТ СЫЛЛАРА
П. Одорусов тыллара, Н.Бойлохов мелодията

Тыһыынча тоҕус сүүс түөрт уон биир түөрт уон биэс –
Тыыннаахтар умнубат сыллара,
Адьырҕа өстөөҕү кыдыйар ытык иэс
Андаҕар этиллэр тыллара

Ол этэ уот сэрии ынырык сыллара
Тыыннаахтар умнубат сыллара.

Биир ньыгыл сомоҕо модун күүс оҥорон
Партия норуоту түмпүтэ,
Абарыы-сатарыы дууһаны толорон
Барыбыт санаатын күүрпүтэ.

Ол этэ уот сэрии ынырык сыллара
Тыыннаахтар умнубат сыллара.

Хаан-хааҥҥа! Тыын-тыыҥҥа! Кырыктаах атаака
Хатанан хаалбыттар харахпар!
Ийэ буор, сир-халлаан хаһыыта, ынчыга
Иһиллэр курдуктар кулгаахпар.

Ол этэ уот сэрии ынырык сыллара
Тыыннаахтар умнубат сыллара.

[Синильга]

МИН МАНТАН СЭРИИГЭ БАРБЫТЫМ
И.Артамонов тыллара, Д.Данилов мелодията

Мин мантан сэриигэ барбытым
Кыракый балаҕан дьиэбиттэн,
Ыраахха диэритин кэтэһэн
Турбута кырдьаҕас мин аҕам.

Мин мантан сэриигэ барбытым
Оскуола чуораанын хаалларан,
Колхоһум соноҕос атынан
Суол буорун бурҕатан ааспытым.

Мин мантан сэриигэ барбытым
Бар дьонум алгыһын ыламмын.
Далбаатыы хаалбыта алааһым
Будьурхай баттахтаах тыатыныын.

[Синильга]

КӨРСҮҺҮҮ
Г. Ефимов тыллара, биллибэт автор мелодията

Сэрии уотугар хас да сыл сылдьан
Саллаат ыар кэмнэрин көрбүтэ,
Суумкатын сүгэн, сулуһун анньан
Дьиэтигэр бу төннөн испитэ.

Төрөөбүт сирэ, олорбут дьиэтэ
Иннигэр элэҥнээн көһүннэ.
Сүрэҕэ күүскэ тиҥиргии тэптэ-
Сүр күүстээх ахтылҕан билиннэ.

Халҕаны аһан дьиэтигэр киирдэ,
Кырдьаҕас ийэтэ билбэтэ:
-Кэпсээннээ, тукаам, Ким-хайа этиҥ,
Хантан бу айаннаан иһэҕин?

Оо, ийээ, - диэтэ, - эн уолуҥ этим,
Дьиэбэр бу эргиллэн кэллим,
Кыа хааннаах сэрии уотуттан ордон
Төрөөбүт алааспын дьэ буллум.

Көр, бу мин дьолбун – көмүс оҕобун
Көрөр да күннэрдээх эбиппин!..
Үрдүгэр түһэн уолун уураата,
Үөрүүттэн долгуйан ытаата.

Төрөөбүт дьиэтэ үөрүүнэн туолла.
Күп-күлүмнэс күн көрдө.
Ыллыаҕыҥ дьоруой саллаат туһунан,
Күн ийэ тапталын туһунан.

[Синильга]

ГЕРОЙ ПОПОВ ТУҺУНАН ЫРЫА
И. Винокуров – Чаҕылҕан тыллара, А. Попов мелодията

Днепр тымныы долгуннарын
Туоруур Саха уола,
Тула ууга бырдааттанар
Ардах буульда суола.

Туораан немец оккуоппатын
Күдэн-таһаан тибэр,
Өстөөх үөрэ куоппатын диэн
Кэрдэр, кимэн киирэр.

Ахта өстөөх пулемета
Өлүк кили тула,
Онно аргыый сыыллан үөмтэ
Саха туйгун уола.

Днепр тымныы долгуннарын
Кыһыл сэрии туоруур,
Өстөөх үөрүн бу самнаран
Көҥүл суолун солуур.

[Синильга]

УОЛ ЫРЫАТА
Х. Горохов тыллара, Егор Неустроев мелодията үһү (көннөрдүм)

Дугуйаҥҥын хаампыт сиргэр
Долгун курдук от үүнэр,
Таптыы көрбүт алаастаргар
Кустук түhэн көччүйэр.

Кыламаҥҥар күн үҥкүүлүүр,
Кыраhыабай да кыыскын!
Ханнык уолан дьолун түстүүр
Аналыгар сылдьаҕын?

Сөтүөлээри киирбит уугар
Кэлэр күммүт саҕыллар,
Уhун-уhун суһуохтаргар
Дьикти хоһоон айыллар.

Хоту дойду ньургуhуна
Холооннооҕор ааҕынар,
Амма эбэ сардааната
Ааккын куруук сураһар.

[Синильга]

ТИҺЭХ ЧУОРААНЧЫК
А. Афонскай тыла уонна мелодията

Тиһэх чуораанчыкка долгуйа турабын мин бүгүн.
Кынаттаабыт оскуолабын кытары арахсабын.
Төннүөм дуу манна аны хаһан эмит?
Быраһаай, оскуолам, быраһаай.

Умнуом суоҕа оскуола кэмнэрин -
Бастакы тапталы, бастакы уруокпун,
Учууталбын, учууталбын.

Хаһан эрэ сүүрэ-сүүрэ сылдьыбыт оскуолабын
Бүгүн атын харахпынан мин көрөбүн.
Төннүөм дуу манна аны хаһан эмит?
Быраһаай, оскуолам, быраһаай.

Умнуом суоҕа оскуола кэмнэрин -
Бастакы тапталы, бастакы уруокпун,
Учууталбын, учууталбын.